Wednesday, June 17, 2020

ആശ്വാസ മേഖല

ഇന്നൊരു വാട്സ്ആപ്പ് സ്റ്റാറ്റസ് കണ്ടത് dreams wont work unless you do.. എന്നാണ്...  ശരിക്കും എന്റെ പ്രശ്നവും അതൊക്കെ തന്നെയാണ്... ഒരുപാട് സ്വപ്നങ്ങൾ ഉണ്ട് അതിൽ പലതിനും വ്യക്തമായ ധാരണകളും ഉണ്ട്... പക്ഷെ  സ്വപ്നങ്ങളുടെ പുറകേ പോകാൻ നിലവിലെ ആശ്വാസ മേഖല (comfort zone) എന്നെ പിന്നിലേക്ക് വലിക്കുന്നു എന്നതാണ് യാഥാർഥ്യം. അതിനായി നിലവിൽ ഉള്ള സാഹചര്യങ്ങളെ കുറിച്ച് ചിന്തിച്ച് അതിൽ നിന്നും മാറിയാൽ എന്തോ അപകടം പറ്റും എന്ന് ഞാൻ തന്നെ മാറാതിരിക്കാനുള്ള കാരണങ്ങൾ കണ്ടെത്തും... 

എല്ലാവരുടേയും സ്ഥിതി ഇതൊക്കെ തന്നെയാവും... ജീവിതത്തിൽ എന്തെങ്കിലും നേടാൻ നമ്മൾ ശ്രമിക്കാതെ നടക്കില്ല... എത്ര മോട്ടിവേഷൻ ക്‌ളാസുകൾ കണ്ടാലും നമ്മൾ ശ്രമിക്കാതെ നമുക്ക് ഒന്നും ലഭിക്കില്ല എന്നതാണ് യാഥാർഥ്യം ... എന്നാൽ ഈ സത്യം ഒരു മോട്ടിവേഷണൽ ക്ലാസുകാരനും പറഞ്ഞു തരില്ല കാരണം അവന്റെ ബിസിനസ്സ് വളർച്ച നമ്മുടെ തളർച്ചയിൽ ആണ് ... യുട്യൂബിൽ യാഥാര്ച്ഛികമായി കണ്ട ഒരു വിഡിയോയിൽ പ്രാസംഗീകൻ സംസാരിച്ചു തുടങ്ങി അഞ്ചാം മിനിറ്റിൽ ഇങ്ങനെ പറഞ്ഞു if you want to achieve any thing in your life stop watching this fucking video and do the things to achieve your goals...

ഇങ്ങനെ എത്ര പ്രാസംഗീകർ പറഞ്ഞിട്ടുണ്ടാകും എന്ന് എനിക്കറിയില്ല ... നമ്മൾക്ക് എന്തെങ്കിലും നേടണമെങ്കിൽ നമ്മൾ തന്നെ അത് ചെയ്യണം ... ഞാൻ ഇത് എഴുതുന്നത് എനിക്ക് വേണ്ടി തന്നെയാണ് നിങ്ങള്ക്ക് വേണ്ടിയല്ല ... കെട്ടുപാടുകളിൽ കെട്ടിപ്പിച്ചുള്ള സുഖ നിദ്രയിൽ ദുഃസ്വപ്നം പോലെ വരുന്ന ഭാവി ചിന്തകളെ ഒളിക്കാൻ ഞാൻ തന്നെ കണ്ടെത്തുന്ന വഴികളിൽ നിന്നും അൽപ്പമെങ്കിലും മാറി നടക്കുവാൻ വേണ്ടി മാത്രം...

Tuesday, December 31, 2019

സൈബർ ലോകത്തിലെ അടിസ്ഥാന സുരക്ഷകൾ

ഓരോ ദിവസവും കഴിയുന്തോറും നമ്മളുടെ ജീവിതം കൂടുതൽ ഡിജിറ്റൽ ആവുകയാണ്. അതിനാൽ തന്നെ നമ്മുടെ ഡിജിറ്റൽ ജീവിതം കൂടുതൽ സുരക്ഷിതമാക്കേണ്ട കടമ നമുക്ക് മാത്രമാണ്. ഏഴാം കടലിനുമക്കരെ ഇരുന്നു കൊണ്ടു നമ്മുടെ വ്യക്തി ജീവിതത്തിനെ തന്നെ ഇല്ലാതാക്കാൻ  ഒരു ഹാക്കേർക്ക് സാധിക്കും എന്ന ബോധ്യത്തോടെ വേണം ഡിജിറ്റൽ യുഗത്തിൽ ജീവിക്കുവാൻ. ഏതൊരു ജീവിതവും വിജയം കാണുവാൻ ചിട്ടയായ ചില ജീവിതചര്യകൾ ആവശ്യമായിരിക്കുന്നത് പോലെ ഡിജിറ്റൽ ജീവിതത്തിലും ചില ചിട്ടകൾ ആവശ്യമാണ്... അതിലെ ചില അത്യാവശ്യമായി ചിട്ടകൾ നമ്മുടെ ഡിജിറ്റൽ ജീവിതത്തിന്റെ ഭാഗമാകേണ്ടത് പറയട്ടെ..

1. പാസ്സ്‌വേർഡ്‌ എന്നതിന് പകരം പാസ്ഫ്രേസ്.
പാസ്സ്‌വേർഡ്‌ എന്നത് കൊണ്ട് ഒരു വാക്കിനെ ആണ് ഉദേശിക്കുന്നതെങ്കിലും ഇന്നത്തെ കാലത്ത് ഒരു വെബ്സൈറ്റിലേക്കോ, ആപ്പിലേക്കോ കടക്കാൻ ഒരു വാക്കിൽ നിന്നും വാക്യത്തിലേക്ക് (phrase) മാറേണ്ട കാലം അതിക്രമിച്ചു കഴിഞ്ഞു. ഇപ്പോൾ ഒരു പാസ്സ്‌വേർഡ്‌ എന്നത് രണ്ടും മൂന്നും വാക്കുകളും, അതിൽ സഖ്യകളും, ചിഹ്നങ്ങളും ചേർത്തു ഒറ്റവാക്കാക്കുക എന്നതാണ് ഉദേശിക്കുന്നത്
Eg:- iLoveMyMother@#143

2. എങ്ങനെയാണ് ഒരു പാസ്സ്‌വേർഡ്‌ ഉണ്ടാക്കേണ്ടത്.
 പാസ്സ്‌വേർഡ്‌ ഉണ്ടാക്കുമ്പോൾ ഇംഗ്ലീഷ് അക്ഷരങ്ങളിൽ വലിയ /ചെറിയ അക്ഷരങ്ങളും മറ്റ് ചിഹ്നങ്ങളും ചേർത്ത് കുറഞ്ഞത് 12നു മുകളിൽ അക്ഷരങ്ങൾ, ചിഹ്നങ്ങൾ, സഖ്യകൾ എന്നിവ  ഉപയോഗിക്കുക. പലപ്പോഴും പല വെബ്സൈറ്റുകളും പ്രിത്യേകിച്ചു ബാങ്കിംഗ് വെബ്‌സൈറ്റുകളിൽ ഇതിനെ കുറിച്ചു നിദേശങ്ങൾ ഉണ്ടാകാറുണ്ട് അഥവാ ഇല്ലെങ്കിൽ ഇതുപോലെ ഉണ്ടാക്കാം. Eg:- iLoveMyMother@#143. അതുപോലെ നിങ്ങൾക്ക് മംഗ്ളീഷ് (ഇംഗ്ലീഷ് അക്ഷരങ്ങൾ ഉപയോഗിച്ച് മലയാളം വാക്കുകൾ എഴുതുന്ന രീതി) അറിയാമെങ്കിൽ അത് ഉപയോഗിച്ചും പുതിയ പാസ്സ്‌വേർഡ്‌ ഉണ്ടാക്കാം.

3.Two Step Verification, OTP, Recovery codes & email.
എല്ലാ സോഷ്യൽ മീഡിയ, ഇമെയിൽ വെബ്സൈറ്റുകളും നിങ്ങളുടെ അക്കൗണ്ട് സുരക്ഷിതമാക്കുവാൻ മേൽ പറഞ്ഞ രണ്ട് തരത്തിലുള്ള രണ്ടാം സുരക്ഷാ കോഡുകൾ ഉണ്ട്. പാസ്സ്‌വേർഡ്‌ ഉപയോഗിച്ചു ലോഗിൻ ചെയ്താലും ഫോണിൽ മറ്റൊരു ആപ്പിൽ ഉണ്ടാകുന്ന സുരക്ഷാ കോഡുകൾ (TOPT) അല്ലെങ്കിൽ sms (OTP) ആയി വരുന്ന കോഡുകൾ ഉപയോഗിച്ചു മാത്രമേ പ്രേവേശിക്കുവാൻ സാധിക്കു. ഇനി അഥവാ പാസ്സ്‌വേർഡ്‌ മറന്നാൽ അത് തിരികെ കിട്ടുന്നതിനുമുള്ള റിക്കവറി കോഡുകളും നൽകുന്നുണ്ട്. അതുപോലെ അക്കൗണ്ട്‌ തിരികെ കിട്ടാൻ നിങ്ങളുടെ തന്നെ മറ്റൊരു ഇമെയിൽ, ടെലിഫോൻ നമ്പറുകളും കൊടുക്കുവാൻ സാധിക്കും. ഇതൊക്കെ എനേബിൾ ചെയ്തു വെക്കുന്നത് നിങ്ങളുടെ ഓൺലൈൻ അക്കൌണ്ട് സുരക്ഷിതമാക്കാൻ സഹായിക്കും. ഈ കോഡുകൾ മറ്റാർക്കും കൊടുക്കാതിരിക്കുക. 

4. പാസ്‌വേർഡ് 6മാസം കൂടുമ്പോൾ മാറ്റുക.
 മേൽ പറഞ്ഞ രീതിയിൽ നിങ്ങൾ പുതിയ പാസ്‌വേർഡ് ഉണ്ടാക്കിയാലും അത് എല്ലാ ആറു  മാസം കൂടുമ്പോഴോ അല്ലെങ്കിൽ കുറഞ്ഞപക്ഷം ഒരു വർഷത്തിനുള്ളിൽ മാറ്റി പുതിയത് ഇടുവാൻ ശ്രദ്ധിക്കുക. പാസ്സ്‌വേർഡ്‌ മാറ്റുമ്പോൾ അതിൽ ഉപയോഗിക്കുന്ന ചിഹ്നങ്ങൾ, അക്ഷരങ്ങൾ ഒക്കെ മാറ്റുവാൻ ശ്രദ്ധിക്കുക.

5. ഒരു പാസ്സ്‌വേർഡ്‌ മാനേജർ ഉപയോഗിക്കുക.
ഇന്നത്തെ കാലത്ത് ഏത് വെബ്‌സൈറ്റിലും ലോഗിൻ ചെയ്യാനും ഒരു യൂസർ ഐഡിയും, പാസ്സ്‌വേർഡ്‌ വേണം. ഒരേ യൂസർ ഐഡിയും പാസ്‌വേർഡും ഉപയോഗിച്ചാൽ ഉള്ള അപകടം എന്നത് ഏതെങ്കിലും ഒരു വെസൈറ്റ് ഹാക്ക് ആയി നിങ്ങളുടെ യൂസർ ഐഡിയും, പാസ്സ്‌വേർഡും ഹാക്കർക്ക് കിട്ടിയാൽ നിങ്ങളുടെ മുഴുവൻ അക്കൗണ്ടുകളും ഹാക്ക് ആകാനുള്ള സാധ്യതയുണ്ട്. അതുകൊണ്ട് എല്ലാ വെബ്‌സൈറ്റിലും ഒരേ ഐഡി കൊടുത്താലും (അഭികാമ്യമല്ല) ഒരിക്കലും ഒരേ പാസ്സ്‌വേർഡ്‌ ഒകൊടുക്കരുത്. അങ്ങനെ ഒരുപാട് പാസ്‌വേർഡുകൾ ഉണ്ടാക്കുന്നതിനും, അത് കൃത്യമായി സൂക്ഷിച്ചു വെക്കുന്നതിനും, ഓരോ പ്രാവശ്യം ലോഗിൻ ചെയ്യുമ്പോഴും കൃത്യമായി ഉപയോഗിക്കാനും നിങ്ങളെ സഹായിക്കുന്ന സോഫ്റ്റ്‌വെയർ ആണ് പാസ്സ്‌വേർഡ്‌ മാനേജറുകൾ. അതിൽ നിങ്ങളുടെ എല്ലാ ലോഗിൻ വിവരങ്ങളും സൂക്ഷിക്കാം അതുപോലെ വ്യത്യസ്തങ്ങളായ പാസ്സ്‌വേർഡുകൾ ഉണ്ടാക്കിയെടുക്കാം. ഈ ആപ്പിന്റെ മാസ്റ്റർ പാസ്സ്‌വേർഡ്‌ മാത്രം നമ്മൾ ഓർത്തു വെച്ചാൽ  മതി. വെബ്‌സൈറ്റിൽ ലോഗിൻ ചെയ്യുമ്പോൾ ഈ ആപ്പ് തുറന്നു അതിൽ സേവ് ചെയ്തിട്ടുള്ള ലോഗിൻ ഡീറ്റെയിൽസ് ഓട്ടോമാറ്റിക്കായി അതിൽ രേഖപ്പെടുത്തി ലോഗിൻ ആകും എന്നതാണ് ഇതിന്റെ ഗുണം.

6. കിട്ടുന്ന എല്ലാ ലിങ്കുകളും തുറക്കാതിരിക്കുക.
ഈ ലിങ്കിൽ പോയാൽ അത്ഭുതം കാണാം, നിങ്ങൾക്ക് 15 ലക്ഷം രൂപ സമ്മാനം അല്ലെങ്കിൽ കാറുകൾ സമ്മാനം എന്നൊക്കെ നമ്മളെ പ്രലോഭിപ്പിക്കുന്ന പല sms, ഇമെയിൽ, വാട്സാപ്പ് മെസ്സേജുകൾ വരാറുണ്ട്. ചിലതു നമ്മളുടെ സുഹൃത്തുക്കൾ തന്നെ അയച്ച രീതിയിൽ ആവും. ഇതിൽ ഒരു ലിങ്ക് കൂടി കാണും ഇങ്ങനെ വരുന്നതിൽ മിക്കതും പരസ്യങ്ങൾ ആവാമെങ്കിലും ചിലതു അപകടകാരികൾ ആണ്. ആ ലിങ്കിൽ പോകുകയും അതിൽ പറഞ്ഞ പ്രകാരം ചെയ്യുകയും ചെയ്‌താൽ നിങ്ങളുടെ അക്കൗണ്ടുകൾ, ഫോണുകൾ ഒക്കെ ഹാക്ക് ആകാൻ സാധ്യതയുണ്ട്. അതുവഴി നിങ്ങളുടെ പേരിൽ നിങ്ങളുടെ കോണ്ടക്ടസിലേക്ക് അത് വ്യാപിക്കാൻ ഇടയാകും. ഒരുപക്ഷെ നിങ്ങൾ പോലും അറിയാതെ. അതുകൊണ്ടു ഇതുപോലത്തെ മെസ്സേജുകൾ ഡിലീറ്റ് ചെയ്യുകയാണ് അഭികാമ്യം.

7. Https & website Address URL.
ഫിഷിങ് എന്നൊരു ഹാക്കിങ് വിദ്യയുണ്ട് അതായത് നിങ്ങളുടെ ഉപയോഗിക്കുന്ന വെബ്സൈറ്റ് പോലത്തെ മറ്റൊരു വ്യാജ വെബ്‌സൈറ്റുകൾ ഉണ്ടാക്കി മേല്പറഞ്ഞപോലെ ഒരു sms ലിങ്ക് അയച്ചു തരുന്നു നിങ്ങൾ ലിങ്കിൽ ക്ലിക്ക് ചെയ്യുമ്പോൾ നിങ്ങൾ കാണുന്നത് ഒന്നുങ്കിൽ നിങ്ങളുടെ ഒരു ബാങ്ക് വെബ്സൈറ്റ് അല്ലേൽ ഇമെയിൽ വെബ്‌സൈറ്റ് പോലത്തെ വ്യാജ സൈറ്റുകൾ ആയിരിക്കും നിങ്ങൾ അതിന്റെ URL ശ്രദ്ധിക്കാതെ യൂസർ ഐഡിയും പാസ്സ്‌വേർഡും നൽകി ലോഗിൻ ചെയ്യാൻ ശ്രമിക്കുമ്പോൾ ഹാക്കെർക്ക് അതെല്ലാം കിട്ടുന്നു. അത് കൊണ്ട് ഇത്തരം ലിങ്കിൽ ക്ലിക്ക് ചെയ്യാതിരിക്കുക, അതുപോലെ എപ്പോഴും വെബ്‌സൈറ്റ് എടുക്കുമ്പോൾ നിങ്ങൾ ഉദ്ദേശിക്കുന്ന വെബ്‌സൈറ്റ് ആണോ എന്ന് വെബ് ബ്രൗസറിന്റെ അഡ്രസ് ബാറിൽ ഉള്ള അഡ്രസ് ശ്രദ്ധിക്കുക.

8. അപ്‌ഡേറ്റുകൾ ചെയ്യുക
കമ്പ്യൂട്ടറിന്റെ ആയാലും, മൊബൈൽ ഫോണിന്റെ ആയാലും അതിൽ ഉപയോഗിക്കുന്ന ആപ്പുകൾ എല്ലാം അപ്‌ഡേറ്റ് ആക്കാൻ ശ്രദ്ധിക്കുക. ആപ്പ് / സോഫ്റ്റ്‌വെയറിനുള്ളിൽ ഉണ്ടായിട്ടുള്ള പഴുതുകൾ പരിഹരിക്കുന്ന അപ്‌ഡേറ്റുകൾ ആയിരിക്കും ഇങ്ങനെ ലഭിക്കുന്നത്  ഇന്റർനെറ്റ് ഡാറ്റ ലാഭം നോക്കി അത് ചെയ്യാതിരിക്കുന്നത്  ഫോൺ, കമ്പ്യൂട്ടർ ഹാക്ക് ആകാനുള്ള സാധ്യത കൂട്ടുന്നു.

9. ആവശ്യമില്ലാത്ത ആപ്പുകൾ ഫോണിൽ അൺഇൻസ്റ്റാൾ ചെയ്യുക 
ആവശ്യമില്ലാത്ത ആപ്പുകൾ ഡിലീറ്റ് ചെയ്തു കളയുക. ചിലപ്പോൾ നമ്മൾ ഇൻസ്റ്റാൾ ചെയ്തിരിക്കുന്ന ആപ്പുകൾ ചിലപ്പോൾ അത് ഉണ്ടാക്കിയവർ തന്നെ ഉപേക്ഷിച്ചതാവും  അപ്പോൾ അതിന്റെ അപ്‌ഡേറ്റുകൾ ഒന്നും ലഭിക്കില്ല അതിൽ എന്തെങ്കിലും പഴുതുകൾ ഉണ്ടേൽ അത് വഴി നമ്മുടെ ഫോൺ ഹാക്ക് ആകാനുള്ള സാധ്യത ഉണ്ട്. അതിനാൽ നമ്മൾക്ക് ആറു മാസത്തിൽ കൂടുതൽ ഉപയോഗിക്കാത്ത ആപ്പുകൾ ഡിലീറ്റ് ചെയ്യുന്നതാന് അഭികാമ്യം. അത് വഴി ഫോണിന്റെ മെമ്മറിയും ഉപയോഗം കുറയും, അത് മറ്റു കാര്യങ്ങൾക്ക് ഉപയോഗിക്കാം .

ഏതൊക്കെ സെക്യൂരിറ്റി ആപ്പുകൾ ഉണ്ടെങ്കിലും സൂക്ഷിക്കേണ്ടത് നമ്മൾ തന്നെയാണ്.. അതിനാൽ സൈബർ യുഗത്തിൽ കൂടുതൽ ജാഗ്രത പുലർത്തുക എന്നതാണ് അഭികാമ്യം..

Friday, December 28, 2018

പുതുവത്സര വിചാരങ്ങൾ

വിരലിൽ എണ്ണാവുന്ന ദിവസങ്ങൾ കഴിഞ്ഞാൽ പുതിയൊരു വർഷം ആരംഭിക്കുകയാണ്.. 

ആധുനികതയുടെ കുതിച്ചു ചാട്ടത്തിൽ ഇന്ന് ലോകം ഒരു വിരൽ തുമ്പിലേക്ക് ചെറുതായി, മറ്റൊരു രീതിയിൽ പറഞ്ഞാൽ നമ്മൾ എന്നതിൽ നിന്നും ഞാൻ എന്നതിലേക്ക് എല്ലാ വികാരങ്ങളെയും നമ്മൾ സൗകര്യപൂർവ്വം ഒതുക്കി..

ഇന്നത്തെ നമ്മുടെ പ്രഭാതം ആരംഭിക്കുന്നത് തന്നെ വാട്സാപ്പിൽ വരുന്ന വൈകാരികമായി നമുക്ക് ഒന്നും ലഭിക്കാത്ത കുറെ ശുഭദിനം, ഗുഡ് മോർണിംഗ് ഫോർവെർഡ് മെസേജുകൾ കൊണ്ടാണ്. അത് വെറുതെ തുറന്ന് നിർവികാരത്തോടെ നോക്കി അത് മറ്റൊരുവന്റെ പേരിലേക്ക് അയച്ചുകൊണ്ടു നമ്മുടെ ദിനചര്യകൾ ആരംഭിക്കുന്നു.. ഇതു തന്നെ കിടക്കാൻ നേരവും മരുന്നെന്നു കണക്കെ നിത്യവും ചെയ്യുന്നു..

ഇതു തന്നെയാണ് മറ്റ് സോഷ്യൽ മീഡിയ സാങ്കേതങ്ങളിലും സംഭവിക്കുന്നത്.. കുറച്ചു ലൈക്കുകൾ, കമെന്റുകൾ എന്നിവയ്ക്ക് വേണ്ടി എന്തും, ഏതും ഏതറ്റവും വരെ ചെയ്യാൻ നമുക്ക് മടിയില്ലാതായി.. 

പരസ്പരം കണ്ടും, സ്പര്ശിച്ചും നമ്മൾ കാത്തു സൂക്ഷിച്ച പവിത്രമായ ബന്ധങ്ങൾ മുഴുവനും ഇപ്പോൾ സൈബർ ലോകത്തിലേക്ക് മാറി.. അടുത്തുള്ളവരെ അറിയില്ലായെങ്കിലും ഏഴാം കടലിനക്കരെയുള്ള വരെ നമുക്ക് അറിയാം..

എന്റെ നിരീക്ഷണത്തിൽ ഇതിന്റെ ഒക്കെ പരിണിത ഫലം എന്നത് നിരാശ അല്ലെങ്കിൽ ഡിപ്രഷൻ എന്ന അവസ്ഥയിൽ ആയിരിക്കും എന്നാണ് കാരണം സൈബർ ലോകത്തിലെ ആൾ കൂട്ടം വെറും മായയാണ്. 

നമ്മുക്ക് തിരിച്ചു ഒരു അഞ്ചു കൊല്ലം പുറകോട്ട് നടക്കാം.. എല്ലാ നല്ല ബന്ധങ്ങളെയും നേരിട്ട് കണ്ടു, സ്പർശിച്ചു അറ്റ് പോയ കണ്ണികളെ വീണ്ടും വിളക്കി ചേർക്കാം... അങ്ങനെ ഊഷ്മളതയുള്ള സമൂഹത്തെ നമുക്ക് വാർത്തെടുക്കാൻ നമുക്ക് സാധിക്കട്ടെ എന്ന പ്രത്യാശയോടെ എല്ലാവർക്കും എന്റെ പുതുവത്സരാശംസകൾ!!!

 




Wednesday, June 21, 2017

കൊഴിഞ്ഞുവീണ ശിശിരത്തിലൂടെ...

ഹായ് എന്ന രണ്ടക്ഷരം മുഖപുസ്തകത്തിന്റെ ജാലകം തുറന്നു മുന്നിലേക്ക് വന്നപ്പോൾ ഉണങ്ങിവരണ്ട ഭൂമിയിലേക്ക് വീണ തണുത്ത മഴത്തുള്ളി പോലെയാണ് എനിക്ക് അനുഭവപ്പെട്ടത്. ഉള്ളിന്റെ ഉള്ളിൽ വല്ലാത്ത ഒരു സന്തോഷം തിരതള്ളി പുറത്തേക്ക് വന്നുവെങ്കിലും അത് കെട്ടുപാടുകളുടെ കൂറ്റൻ മതിലുകളിൽ തട്ടി വിറച്ചു, വിറങ്ങലിച്ചു നിന്നു.

ജീവിതം എപ്പോഴും അങ്ങനെയാണ് ഒരു ആകസ്മികത ഉണ്ടാകും പക്ഷെ അത് ജീവിതത്തിൽ ഉണ്ടാക്കുന്ന ആശകൾ പലപ്പോഴും  ആശങ്കകളായിട്ടാണ് പരിണമിക്കാറ്. അതേ ആശങ്കയിലൂടെയാണ് ഇപ്പോൾ ഞാനും. ആ രണ്ടക്ഷരത്തിന് ഇപ്പോൾ പല ജീവനുകളുടെ, ജീവിതങ്ങളുടെ വിലയാണ്. അതിനെ എങ്ങനെ ഉൾക്കൊള്ളുന്നു എന്നതിനെ ആശ്രയിച്ചിരിക്കും അതിന്റെ വിലയുടെ ഏറ്റക്കുറച്ചിൽ.

എങ്കിലും ഞാൻ ചിന്തകളിൽ മയങ്ങട്ടെ. ഇപ്പോഴത്തെ വസന്തത്തേക്കാൾ കൊഴിഞ്ഞു വീണ ശിശിരത്തിലൂടെ അൽപ്പനേരം....

Saturday, March 26, 2016

സൈബർ അടിമകൾ...!!!

ജീവിതത്തിന്റെ സമസ്ഥ മേഖലകളിലും ഇന്ന് സമർട്ഫോൺ കൈകടത്തിയിരിക്കുന്നു. ലോകത്തിന്റെ സ്പന്ദനം ഇന്ന് നമ്മുടെ വിരൽ തുമ്പിലാണെങ്കിലും മുട്ടിയുരുമിയിരിക്കുന്നവന്റെ വേദനകളോ, ബുദ്ധിമുട്ടുകളോ അവൻ ഫ്‌ബിയിൽ ഇടുന്നതുവരെ നമ്മൾ അറിയാറില്ല ഇപ്പോൾ.
ഇന്നലെ വലിയ വെള്ളിയാഴ്ച്ച ആയിരുന്നല്ലോ. ഓർത്തഡോൿസ് സഭാതലവന്റെ കല്പനപ്രകാരം ഇന്നലെ സൈബർ ഫാസ്റ്റ് സഭാ വിശ്വസിയെന്ന നിലയിൽ ആചരിക്കാൻ ശ്രമിച്ചു. സത്യം ജീവിതത്തിൽ ഏറ്റവും കൂടുതൽ ഞാൻ അടിമപ്പെട്ടിരിക്കുന്നത് സ്മാർട്ഫോണിൽ ആണ് എന്നുള്ള തിരിച്ചറിവ് ഇന്നലെ ഞാൻ ഞെട്ടലോടെ മനസിലാക്കി.
മുന്നമേ പറഞ്ഞപോലെ ലോകം വിരൽതുമ്പിൽ എത്തുന്നതിനു മുൻപേ നമുക്ക് സമാധാനമുണ്ടായിരുന്നു, സുഹൃത്തുക്കൾ ഉണ്ടായിരുന്നു, ആഘോഷങ്ങളും ഒത്തൊരുമയുമുണ്ടായിരുന്നു. എന്നാൽ ലോകം ചുരുങ്ങി നമ്മുടെ മനസും ചുരുങ്ങി നമ്മളിലേക്ക് മാത്രം ചിന്തിക്കുന്ന കാലഘട്ടത്തിൽ എത്തിരിക്കുന്നു നാം. അതിനാലാണ് കുറച്ചു ലൈക്സ് വേണ്ടി സ്വന്തം അമ്മയുടെയും സഹോദരിമാരുടെയും നഗ്‌നത വിരൽ തുമ്പിൽ നിന്നും വിരൽ തുമ്പിലേക്ക് അതിവേഗം കൈമാറ്റം ചെയ്യപ്പെടുന്നത്.
തല കുനിച്ചു തന്റെ കയ്യിലിരിക്കുന്ന സ്മാർട്ട് ഫോണിലേക്ക് മാത്രം നോക്കി അതിലൂടെ ലോകത്തെ കാണുവാൻ ശ്രമിക്കുന്ന ഒരു തലമുറ നമ്മുടെ ഇടയിൽ വളർന്നുവരുന്നു. ആരോ എഴുതിയുണ്ടാക്കിയ ചിലത് വായിച്ചു അതിൽ മറുചിന്തകൾ വെച്ച് യുദ്ധം ചെയ്യുന്ന നിഷ്‌ക്രിയരായ പുതിയ തലമുറ. തൊട്ടു മുൻപിലുള്ള നമ്മുടെ ലോകത്തെ അല്ലെങ്കിൽ സമൂഹത്തെ കാണാതെ എത്ര അറിവ് സമ്പാദിച്ചാലും അതൊന്നും മനുഷ്യനന്മയ്ക്ക് ഉപകരിക്കില്ല.
ഞാൻ ഒരിക്കലും സ്മാർട്ട് ഫോൺ വിരോദിയല്ല. ഈ കുറിപ്പ് എഴുന്നതും ഒരു സമർട് ഫോണിലാണ് എങ്കിലും കിട്ടിയ സൗകര്യങ്ങൾ അത് മനുഷ്യനന്മയ്ക്കായി ഉപയോഗിക്കുമ്പോളാണ് നമ്മുടെ മൂല്യങ്ങൾ വളരുന്നത് ജീവിതവിജയം ഉണ്ടാകുന്നതു...

ഈ ബ്ലോഗിലേക്ക് വരുകയും എന്‍റെ മനോവിചാരങ്ങള്‍ വായിക്കുകയും ചെയ്ത താങ്കള്‍ക്ക് എന്‍റെ ഹൃദയം നിറഞ്ഞ നന്ദി